Commonwealth Games Scam 2010 – Complete Story in Hindi

2010 Commonwealth Games Scam India ke sabse bade scams me se ek hai. Jisme Kareeb 70,000 crore ka ghotala hua tha. Is incident ne na sirf global level par India ki image down ki balki India ke kayi social and economical issues ko highlight kiya.

1930 me introduce hua Commonwealth Games ek internationally popular multi-sport event hai jisme commonwealth nations ke athletes participate karte hai. Har 4 saal me ye event conduct karaya jata hai by Commonwealth Games Federation. Ye world ka 3rd largest sports event hai after Olympics and Asian Games.

2010 ke Commonwealth Games ko New Delhi ne host kiya tha, jisme 71 countries ne participate kiya aur ye pure 12 days ka sports event tha. ( 3 oct – 14 oct). Is poore global event ko organize karne ki responsibility Commonwealth Games Committee ki thi. Is committee ke chairman Suresh Kalmadi the, jo ki us time pe congress party ke representative hua karte the from Pune constituency.

Photo WA-4869L | XIX Commonwealth Games-2010 Delhi: Netball … | Flickr

Is poore event ka estimated budget ₹115 billion tha. Itna huge budget lagane ke baad bhi Delhi ek world-class event host karne se koso dur thi. Venues ready nahi the, basic equipment nahi aaye the. Athletes ke rehne ke liye ek commonwealth Games village build kiya gaya tha. Unke arrival se 10din pehle foreign crews ko invite kiya gaya taaki unhe ek tour diya jaa sake un apartments ka jahaan pe delegates rehne wale the. Lekin hua ye ki jab wo log wahaan pahunche to sab ke sab shocked reh gaye the accomodation ki facilities dekh kar. Deewaron aur floors pe paan ke daag, bedsheets pe kutto ke panjo ke nishan and bathroom floors pe human waste which was left behind by the construction workers.

International headlines me ek-ek humiliating detail ko dikhaya gaya. BBC channel ne gande bathrooms aur rooms ki photos release ki. Is horrific incident ke baad Commonwealth games ki international body “Commonwealth Games Federation” ne publicly apna concern jataya ye kehte hue ki hygiene factor and preparations ke saath compromise kiya jaa raha hai! Yahaan tak ki unke head Michael Fennel ne ek independent technical review panel tak announce kiya to monitor Delhi’s progress, but Kalmadi ki organising committee ne is proposal ko reject kar diya.

Games ke starting events me bohot ki kharaab ticket sales dekhi gayi, venues lagbhag khaali the. Competition ke 2nd-day par 100 se bhi kam log the MDC stadium me jiski seating capacity 19000 hai. 20 se bhi kam log aaye the pehla tennis match dekhne is tournament ka. Ek Indian competitor ne jab online tickets khareedna chaha apne relatives ke liye to website ne show kiya ki tickets sold out ho chuki hai but actual me us match wale din stadium bilkul khali tha.

Run-up games me ye situation hone ke baavajood opening ceremony shaandaar thi. Show-stopper aur Australia se aaya hua aerostat both were huge and incredible. Lekin Suresh Kalmadi Indian public ke liye sharmindagi ka kaaran ban chuka tha. Opening ceremony me unki speech ke time pe the entire public booed him. Public ka ye reaction dekh ke, Delhi Chief Minister Sheila Dikshit entered into the picture and ensured ki Delhi ek acha host sabit ho.

CWG Delhi ek corrupt deals ka bhool bhulaiyaa ban chuka tha jisme mostly inflated contracts the. Toilet paper se lekar treadmills tak, sabke inflated bills present kiye gaye. Jo companies best prices offer kar rahi thi unki bajaye aisi companies se equipment aur services khareede gaye jinhone prices over-quote kiye the.  Better deals offer karne wali companies ko disqualify kar diya gaya tha unexplainable reasons dekar. Suresh Kalmadi ne Swiss timings ko ₹141 crore ka contract diya for their equipment jo ki required rate se ₹95 crore zada tha.

Non- existent parties ki payments show ki gayi, jaan bujh ke contracts ke execution ko delay kiya gaya.  Reports se ye pata chala ki jitna amount Indian sportspersons ke liye allot kiya gaya tha usme se actual me sirf aadha kharch kiya gaya unpe. Jo apartments authorities ne allot kiye the athletes ko wahan se unhe nikal kar dusre apartment me shift kiya gaya jinki condition bohot hi jyada kharaab thi. According to Business Today Magazine, 2010 Commonwealth Games ki estimated cost ₹700 billion thi , jo ki ab tak ka sabse expensive commonwealth games raha hai.

File:2010 CWG Badminton Mixed team.JPG - Wikimedia Commons

Is bade scam me bohot se politicians, bureaucrats aur businessmen involved the. Suresh Kalmadi was the main accused kyunki saari supreme powers usi ke paas thi. Kalmadi ke saath do aur naam saamne aaye, former secretary Lalit Bhanot aur V.K Verma. Saare accused logo ko charge kiya gaya criminal conspiracy, cheating, forgery for the purpose of cheating and were charged under Section of the Prevention of Corruption Act.

January 2011 ko Sports Ministry ne Kalmadi aur Bhanot ko organising committee se barkhast kar diya tha. Iske alawa, 25th April 2011 ko Indian National Congress ne Kalmadi ko suspend kar diya unke arrest ke baad aur 2012 London Olympics ki opening ceremony me bhi participate karne se Delhi High court ne mana kar diya tha ye keh ke ki it will cause “embarrassment” to the nation. Saath hi saath PM Manmohan Singh ne Shunglu Panel constitute kiya, taaki games ke conduct me jo bhi irregularities thi unka investigation ho sake. Is panel ke head former comptroller and auditor general of India Mr. V.K Shunglu the.

Is investigation ke liye Central Vigilance Commission (CVC) ko incharge banaya gaya tha, jisne ye dawa kiya ki employees ke appointments me rules ko follow nahi kiya gaya, aur list me non-existing employees ka naam mention tha. Organising committee me aise log appointed the jinka koi anubhav nhi tha unke concerned post ke liye.

Na sirf paison ki chori balki labour law violations, child labour aur sex slavery jaisi cheeze bhi dekhi gayi is scam me. Yahaan tak ki International Olympics Committee ne corruption, government interference aur unki guidelines na follow karne ke liye Indian Olympics Association ko 2012 London Olympics se suspend kar diya tha.

Itne bade scam ka main accused hone ke baad bhi Kalmadi ko sirf 10 mahine ki jail hui aur 2016 me wo bail pe chhut gaya.

Ye thi Kahaani India ke sabse bade scam ki. Jahaan aaj bhi innocent taxpayers ye janna chahte hai ki unke mehant ki kamai ka kya hua. Kyu aise aaropiyon ko chor diya jata hai aur kyu tax revenues ko dhoom dhaam aur dikhawe par kharch kiya gaya, ye jaante hue ki is scenario me India ki priority education, public health aur infrastructure development jaise baaki mudde hone chahiye.

Recommended: Complete Personal Finance Course in Hindi. Learn Money Management & How to Make Money from Money. Click here to Learn More

Scroll to Top