Speak Asia Scam – Complete Story in Hindi

Economic offences Wing ke according Speak Asia scam India ka biggest Multi-level Marketing (MLM) fraud hai. Kareeb ₹2200 crore ke Is fraud ke masterminds the Do bhai, Ram Sumiran Pal aur Ram Niwas Pal. Kam samay me aasani se zada paise kaun nahi kamana chahega ? Isi baat ka faida utha kar ye do bhai ek unique concept lekar aaye.

Ram sumiran pal ne marketing Management me MBA kiya tha. Dono bhai Ram Sumiran Pal aur Ram Niwas Pal Singapore, Italy aur Brazil jaisi countries me registered multi-level marketing companies ke top Management ka part the, saath hi saath multi National banks me kaam bhi kiya tha. Dono ne apne is international profile ko use kiya zada se zada investors ko attract karne ke liye. Yahaan tak ki aage chal ke is profile se unhen money laundering me bhi kaafi help mili.

2008 me Ram Sumiran Pal ne kuch companies khareedi duniya ke alag alag deshon me jaise ki Singapore, Brazil aur Italy. Singapore me Ad Matrix, Speak Asia aur Italy me seven rings International. Speak Asia ek Singapore me registered company thi lekin iske saare operations India me hote the. Ye ek online survey marketing company thi jo web subscriptions sell karti thi ₹11000 me.

India me company register karwana koi badi baat nahi hai lekin main point to ye tha ki fraud ke case me koi bhi individual apne ₹11000 ke liye singapore court me case karne nahi jaayega, isliye company na to India me registered thi aur na hi iska koi office tha.

Speak Asia online me Koi bhi individual ₹11000 ki ek annual fees pay karke apna account open karwa sakta tha. Log jab payment kar dete the uske baad unhen username aur password provide kiya jaata tha taaki wo survey forms Access kar saken. Iske under Logo ko bas survey forms fill karne honge multinational firms ke liye aur return me unhe ₹52000 ka promised annual payment milega. Matlb agar dekha jaaye to logo ko 300% se bhi zada ka return mil raha tha . Aur next year agar membership continue karni hai to firse registration karna padega.

Investors ko per month Sirf do forms fill karne ke liye ₹8000 mil rahe the . Saath hi saath agar wo apne under aur logo ko include karenge is membership me to ₹1000 ka commission bhi milega aur jab koi form fill karega to usme se bhi kuch hissa unko milega. Speak Asia ne pure india me apni franchises kholi aur apne agents ko different stages par ache Commissions diye taaki wo India ke remote areas se bhi investors ko attract kar sake.

Is scheme ki khaas baat ye thi ki iske liye koi eligibility criteria nahi tha. Koi bhi insaan ₹11000 ke saath apna account khol ke forms fill kar sakta tha. Registration fees sirf ₹11000 isliye rakhi gayi thi taaki ek middle class insaan bhi is scheme se jud sake. Company ne investors ko bataya tha ki ICICI bank, Bata, Airtel aur Nestle jaisi companies ne speak Asia ko contract diya hai survey forms fill karwane ke liye.

Har ponzi scheme ki tarah yaha bhi starting me sabhi logo ko unki puri payments di gayi. Sirf ₹11000 ka investment karke log acha khasa paisa kama rahe the. Jin logo ko profit mil raha tha unhone dusaron ko bhi batana shuru kiya iske baare me. Wo alag alag jagahon par seminars aur functions karwane lage.

Ram sumiran pal ke saath company ke baaki promoters pure india me travel kiya karte the. Luxury hotels me agents aur investors ki meetings aur seminars ko address kiya jata tha. Wo ek lavish lifestyle wale business tycoon ki tarah act karte the taaki agents ko encourage kar sake zada se zada innocent logo ko is scheme se jodne ke liye. Dekhte dekhte aur log bhi speak Asia se judne lage. Issi wajah se Speak Asia ko ek MLM company bana diya gaya.

Zada se zada investors attract ho rahe the is scheme ki taraf kyunki baaki MLM scemes ki tarah yahaan kuch bechna nahi tha bas forms fill karne the. Investors ko attract karne ke liye company ne bade numbers dikhana shuru kar diya. Company ne apne ek quarter ka revenue ₹550 crore dikhaya tha. Lekin cheeze jaisi dikhayi jaa rahi thi actual me waisi thi nahi.

Jo bhi surveys speak Asia conduct karwa rahi thi wo sab fake the. Ye surveys sirf fraud karne ke objective se banaye gaye the aur kisi bhi company ne aisa karne ke liye speak Asia ko koi contract nahi diya tha. Company ke shuru hone se lekar ek saal tak sabhi investors ko payment time pe milte rahe. Jaise hi investors badhne lage company ne payment karna band kar diya. Kareeb 24 lakh log is sceme se jude the. Starting me join hue logo ko to unka paisa mila lekin baad me jo log join hue company unka paisa kha gayi.

Is sceme se Kareeb ₹2276 crore ka fraud hua. Speak Asia ne kareeb ₹900 crore tak ka amount Singapore ke bank me remit kiya tha. Ye paisa kayee deshon me alag alag companies me ghumta tha. Singapore se Dubai, Dubai se Italy, Italy se UK, UK se fir Dubai aur last me Dubai se India aa jata tha.

Jab investors ko unke saath hue fraud ka pata chala to unhone speak Asia ke against complaint file karna shuru kiya. India ke lagbhag har state se complaint file ki gayi jisme se Madhya Pradesh se sabse zada complaints aayi thi.

June 2011 me company ke against criminal cases register hone ke baad speak Asia ne apna business shut down kar diya. Lekin iske directors aur office bearers ne internet portal ko sambhala aur investors ko bataya ki company ke against koi bhi case nahi bana hai aur wo jaldi hi company firse start karenge.

Dono bhaiyon ke against total 8 cases file hue the. 2011 me company ke shut down hone ke baad Ram sumiran pal apne in-laws ke saath Dehradun me chupa hua tha. Is scam ke bahar aane ke mahinon tak wo pakada nahi gaya. Ram sumiran Pal ko jaise hi pata chalta ki police use dhundh rahi hai wo kathmandu chala jata tha aur wahaan se flight leke sidha Malaysia. Jaise hi maamla thanda hota wo wapas India aa jata tha. Fir Ek baar Delhi crime branch ko khabar mili ki wo Connaught place aane wala hai. Is khabar ke milte hi Delhi police ne ek trap bana kar use arrest kar liya.

Ram Sumiran Pal ne is fraud se kamaye hue saare paison ko real estate me laga diya tha. Usne Dehradun me villas aur luxury duplex flats ke construction work me paisa lagaya, Mumbai me kayee offices aur residencial places khareede, Yahaan tak ki apne gaon Shajahanpur (UP) me  agricultural aur commercial lands bhi khareedi, hotel banane ke liye.

Enforcement Directorate (ED) ne 210 se bhi zada bank accounts ko freeze karwa diya. Company ke bank accounts se Kareeb ₹200 crore zapt kiye gaye lekin ye amount scam ke amount se bohot hi kam thi. Iska sidha sa Matlb ye tha ki is fraud ka shikar hue mostly logo ko unke paise wapas nahi mile.

Online companies ke registration ke liye koi provision nahi tha India me isliye unhen regulate nahi kiya jaa sakta tha. Is scam ke bahar aane ke baad government ne SEBI act, securities contracts (regulation) act aur depositories act me kayee amendments kiye, Taaki SEBI ko aisi powers provide ki jaa sake jisse ki wo ponzi schemes ko crack kar sake.

Isse SEBI un companies ko question kar sakti hai jinki investment schemes pe usko shak ho. ₹100 crore ya usse zada ki money pooling schemes ko regulate kar sakti hai aur agar companies uske norms ke according kaam nahi karti to unke assests ko attach kar sakti hai.

Zadatar log bina mehnat kiye hi ameer banna chahte hai. Wo ye bhool jaate hai ki apne dreams ko fulfill karne ka koi shortcut nahi hota. Agar aise frauds ko hone se rokna hai to logo ko aware hona padega. Jab bhi koi company government bonds se zada aur fixed return de to ye samjh jana chahiye ki wo fraud hai. Bina risk ke koi return nahi milta, isliye logo ko kisi bhi company ke unrealistic claims se saavadhan rehne ki zarurat hai.

Recommended: Complete Personal Finance Course in Hindi. Learn Money Management & How to Make Money from Money. Click here to Learn More

Scroll to Top